பக்திமுரசு (ஒரு பக்க வாராந்திர இதழ்) சாரல் 05 துளி 23 தேதி 28.08.11
இதழ்ஆசிரியர்:: ஆதிமைந்தன், இணை ஆசிரியர்:: வாயுமித்ரன்
இதழ்ஆசிரியர்:: ஆதிமைந்தன், இணை ஆசிரியர்:: வாயுமித்ரன்
ஸ்ரீகிருஷ்ணாவதார மஹிமை (சென்ற இதழ் தொடர்ச்சி)
(21.08.2011 கோகுலாஷ்டமி ஸ்பெஷல்)
பூதனா பகைமையுணர்வுடன் செயல்பட்டாலும், ஸ்ரீகிருஷ்ணருக்கு தனது பாலையூட்டியதால் அவள் முக்தியடைந்தாள். பூதனாவின் உடல் மீது ஸ்ரீகிருஷ்ணர் விளையாடும் பாக்கியம் அவளுக்குக் கிடைத்தது. பூதனாவின் உடல் கீழே சாய்ந்தவுடன் அங்கிருந்த கோபியர்கள் கோபாலர்கள் அனைவரும் திகைத்து நின்றார்கள். அவ்விடம் மாதா யசோதையும் ரோகிணியும் விரைந்து வந்து பசுவின் வாலைச் சுற்றி குழந்தைக்கு திருஷ்டி சுற்றினார்கள். கன்றுகளின் பாததூளிகளை குழந்தையின் மேல் தூவி, பசுவின் நீரால் குழந்தையைக் குளிப்பாட்டினார்கள். பிறகு விஷ்ணுவின் நாமங்களை ஜபித்தார்கள். அவ்வமையம் மதுராவிலிருந்து நந்தகோபர் திரும்பி வந்து அவ்விடத்தைச் சேர்ந்தார். நடந்தவைகளைக் கேள்விப்பட்டு, வசுதேவர் எச்சரித்ததை உணர்ந்தவராக சிந்தனை செய்தார். பகவான் ஸ்ரீஹரியைப் ப்ரார்த்தனை செய்தார். “என் அன்புக் குழந்தையே, ஸகல உற்பத்திற்கும் காரணமான ஸ்ரீஹரி உன்னைக் காப்பாற்றட்டும், யாருடைய வராகக் கொம்பின் நுனியில் பூமியானது தாங்கப்பட்டுள்ளதோ, அந்த ஸ்ரீவராகமூர்த்தி உன்னை ரக்ஷிக்கட்டும், நகங்களின் நுனியால் பகைவனின் மார்பைப் பிளந்த ஸ்ரீநரசிம்மமூர்த்தியான ஜனார்த்தனன் உன்னைக் காப்பானாக, வாமன ரூபியாக வந்து மூன்றடி மண் கேட்டு மூவ்வுலகங்களையும் அளந்த திருவக்ரமன் எப்போதும் உன்னைப் பாதுகாப்பானாக, உன்தலையை கோவிந்தன் காக்கட்டும், உன் கண்டமதைக் கேசவன் காக்க, உன் குறிஉட்பட்ட வயிற்றை ஸ்ரீவிஷ்ணு காக்கட்டும், முழந்தாள், பாதங்களை ஜனார்த்தனன் காக்க, முகம், கரங்கள், அவற்றின் கீழ்புறங்கள், மனம் மற்றுமுள்ள புலன்களை ஸ்ரீமந் நாராயணன் காக்கட்டும், சங்கு சக்ரம், கதை ஏந்திய எம்பெருமானின் திருச்சங்கின் நாதஓசை உன் பகைவர்களை நாசம் செய்யட்டும். திக்கெட்டும் ஸ்ரீவைகுண்டநாதன் உன்னைக் காப்பானாக! மூலையை மதுசூதனனும், வானத்தில் ரிஷிகேசனும் உன்னை ரக்ஷிக்கட்டும், பூமியிலே தரணிதரன் உன்னைக் காப்பாற்றுவானாக”. என்று விஷ்ணுவின் நாமங்களைக் கூறி நந்தகோபர் குழந்தையாகிய ஸ்ரீகிருஷ்ணருக்கு சாந்திக்கிரியைச் செய்து அங்கிருந்த சகட்டின் கீழ்புறத்தில் தொட்டிலில் வளர்த்தினார். பூதனாவின் உடல் எரியூட்டப்பட்டதால் அதிலிருந்து வீசிய நறுமணம் ஊரெங்கும் பரவியது. இந்நறுமணத்தை நுகர்ந்த அக்கிராமத்து மக்கள் “எங்கிருந்து இந்த நியர்த்தியான வாசனை வருகிறது?” என்று வினவத் தொடங்கினார்கள். இதன்மூலம் குழந்தையாகிய ஸ்ரீகிருஷ்ணர் பூதனா என்னும் அரக்கியை கொன்றார் என்ற் செய்தியை அறிந்தார்கள். குழந்தையை மனமார வாழ்த்தி சந்தோஷமடைந்தார்கள்.
ஸ்ரீகிரஷ்ணரை விஷப்பாலூட்டிக் கொல்ல வேண்டும் என்று ஏவிவிடப்பட்ட அரக்கியான பூதனா வந்தாள். மாண்டாள். ஆனாலும் பரமாத்மாவான ஸ்ரீகிருஷ்ணர் அவள் தனக்கு பாலூட்டியதால் தன் தாயாகவே நினைத்தார். அதனுள்ளிருக்கும் பகைமையுணர்வை அவர் அலட்சியம் செய்தார். பூதனாவிற்கு முக்தியைக் கொடுத்தார்.
பகைமையுணர்வுடன் நெறுங்கிய பூதனாவிற்கே முக்தி கொடுத்தார் என்றால், பகவானின் பக்தர்களுக்கும், அவர்கள் பிரியமுடன் அளிக்கும் “பலம், புஷ்பம், தோயம்” எதுவானாலும் அது எவ்வளவு நன்மையை ஏற்படுத்தும் என்பதை எண்ணிப்பார்க்கவும் முடியுமோ!
பரமாத்மாவான ஸ்ரீகிருஷ்ணர் பூதனாவை வதம் செய்த இச்செய்தியைப் படித்த அனைவருக்கும் பகவான் எல்லா நன்மைகளையும் வாரிவழங்குவார் என்பதாகப் ப்ராத்திப்போமாக. ஸ்ரீகிருஷ்ணரின் அருளைப் பெறுவோமாக.
ஸ்ரீகிருஷ்ணரின் லீலைகள் மிகவும் உயர்ந்தது. முக்தி கொடுக்கக்கூடியது. ஜட மற்றும் பெளதீக செயல்களிலிருந்து விடுபட ஒரு மருந்தாகப் பயன்படக்கூடியது. பகவானின் லீலைகளை ஒருவன் கேட்கும்போது அவன் பகவானிடம் நெருக்கம் கொள்கிறான். ஆத்ம ஞானம் பெறுகிறான். ஸ்ரீகிருஷ்ணரின் லீலையைக் கேட்ட பரிட்சித்மஹாராஜன் முத்தியைப் பெற்றார்.
குழந்தை ஸ்ரீகிருஷ்ணர் இன்னும் கொஞ்சம் வளர்ந்து குப்புறப்படுத்து, தன் பிஞ்சு முட்டிக்கால்களால் தவழத் தொடங்கினார். இச்சமயம் நந்தகோபரும், யசோதாவும் இதை முதலாவது பிறந்தநாளாகக் கொண்டாடினார்கள். இவ்விழா “ஸ்ரீகிருஷ்ண ஜெயந்தி” என்று அழைக்கப்படுகிறது. இன்றும் இவ்விழா ஸ்ரீகிருஷ்ணரின் பக்தர்களால் விமர்சியாகக் கொண்டாடப்படுகிறது. இவ்விழாவில் கோபியர்களும் கோபாலர்களும் திரளாக வந்து கலந்துகொண்டார்கள். காதுகளுக்கினிய வாத்தியம் ஒருபக்கம் முழங்க, மறுபக்கம் வேதவித்தகர்கள் வேதபாராயணம் செய்துகொண்டிருக்க, தெருக்களில் குழந்தைகள் ஓடி விளையாடியவண்ணம் இருந்தார்கள். மாதா யசோதா ஸ்ரீகிருஷ்ணருக்கு நீராட்டி பட்டாடை உடுத்தி அலங்கரித்தார்கள். தானியங்கள், தங்க ஆபரணங்கள் பசுக்கள் யாவும் வேதவிற்பண்ணர்களுக்கு தானமாகக் கொடுத்தார்கள். மாதா யசோதா அங்கு வந்தவர்களை வரவேற்று பரிசுப்பொருட்களைக் கொடுத்துக்கொண்டிருந்தார். அச்சமயம் குழந்தை அழத்தொடங்கியது. விழாவின் மும்முரத்தில் குழந்தை அழுவதை யாரும் கவனிக்கவில்லை. குழந்தை கோபமுற்று கால்களை உதரியது. அதன் கால்கள் அருகில் அமர்த்தப்பட்டிருந்த கைவண்டியின்மேல் பட்டது. அவ்வண்டியின் அச்சாணிகள் கழன்று, அதன் மீது வைக்கப்பட்டிருந்த அனேக தட்டுமுட்டுச் சாமான்கள் கீழே சரமாரியாக விழுந்தது. இதனால் அங்கே பெரும் சப்பதம் ஏற்பட்டது. யாவரின் பார்வையும் அங்கே திரும்பியது. வண்டி நொருங்கியிருந்ததைக் கவனித்தார்கள். இது எவ்வாறு நடந்திருக்க முடியும் என்று சிந்திக்லானார்கள். அங்கிருக்கும் குழந்தைகள், ஸ்ரீகிருணர் காலால் உதைத்ததால் வண்டி சேதமடைந்ததைக் கண்கலால் பார்த்ததாகக் கூறினார்கள். இச்சம்பவம் எல்லோரையும் ஆச்சிரியப்படவைத்தது. (இதன் தொடரை அடுத்தாண்டில் பார்க்கலாம்......)
ஹரே ராம ஹரே ராம ராம ராம ஹரே ஹரே/
ஹரே கிருஷ்ண ஹரே கிருஷ்ண கிருஷ்ண கிருஷ்ண ஹரே ஹரே//
No comments:
Post a Comment